बेल्जियममा देवकोटाको जयन्ती तथा साहित्यिक कार्यक्रम सम्पन्न

कृष्ण बजगाई

महाकवि लक्ष्मी प्रसाद देवकोटाको १०२ औं जन्मजयन्ती बेल्जियमको ल्युभेन सहरमा ६ नोभेम्बरका दिन भब्यताका साथ सम्पन्न भएको छ । अन्तर्राष्ट्रिय नेपाली साहित्य समाज (अनेसास) बेल्जियम च्याप्टरको आयोजनामा भएको उक्त कार्यक्रममा महाकवि देवकोटाको विविध साहित्यिक आयामको चर्चा परिचर्चाका साथ कविता गोष्ठीको पनि आयोजना गरिएको थियो ।



अनेसासका केन्द्रीय वरिष्ठ उपाध्यक्ष तथा बेल्जियम च्याप्टरका अध्यक्ष कृष्ण बजगाईंले देवकोटाले नेपाली साहित्यको सिंगो युगको प्रतिनिधित्व गरेको बताउनु भयो । देवकोटाको कृतिहरु अंग्रेजीमा अनुवाद गराई विदेशी विश्व विद्यालयका पाठ्यक्रममा राख्न पहल गर्नु पर्ने बेला आएको छ । यसको लागि अनेसासले नै पहल गर्नु पर्ने कुरा बजगाईंले बताउनु भयो ।


कार्यक्रमका अतिथि एनआरएन बेल्जियमका महासचिव नन्द घलेले विदेशमा पनि महाकविको जन्मजयन्ती मनाउन पाउनु नेपाली भाषिहरुका लागि गर्वको कुरा हो भन्नु भयो । उहाँले अनेसाससँग एनआरएन भाषा,साहित्य र संस्कृतिका सवालमा संगसंगै कार्य गरेर अगाडि बढ्न् तयार रहेको कुरा बताउनु भयो ।


महाकवि देवकोटाको संक्षिप्त जीवनीको बारेमा चर्चा गर्दै कार्यक्रम संयोजक दीपकज्योती पौडेलले अनेक दुःख, कष्टका सहेर पनि महाकवि देवकोटाले नेपाली साहित्यमा थुप्रै बहुमुल्य कृति प्रदान गर्नु भएको कुरा बताउनु भयो ।


उक्त कार्यक्रममा विभिन्न कवि तथा साहित्यकारहरुले आआफ्ना रचना पाठ गर्नु भएको थियो । कार्यक्रममा कृष्ण बजगाईं, विमल गिरी, दीपेन्द्र के.सी., राजकुमार पुडासैनी, सञ्जु बजगाईं, बोधराज पौडेल, दीपक ज्योती पौडेल, पंचम अधिकारी, राधाकृष्ण अधिकारी, जे बी शेर्पा, सूर्य ढकाल, ओम शर्मा र बिपिन खड्काले आआफ्ना कविता, गीत तथा गजल वाचन गर्नु भएको थियो ।


उक्त कार्यक्रमका लागि नर्वेबाट प्राप्त निराजन शिरिषको कविता बिपिन खड्काले, बेल्जियमबाट पठाइएको उषा गिरीको कविता शिला कोइरालाले र लोक रानाको कविता परमानन्द सापकोटाले वाचन गर्नु भएको थियो । कृष्ण बजगाईंको सभापतित्वमा सम्पन्न उक्त कार्यक्रममा विमल गिरीले स्वागत मन्तब्य र कार्यक्रम संचालन दीपेन्द्र केसीले गर्नु भएको थियो । उक्त कार्यक्रम सफल बनाउन बिनोद धिताल र राजन बस्नेतले हल तथा चियापान ब्यवस्था गराउनु भएको थियो ।


सोही दिन दोस्रो शत्रको कार्यक्रममा अन्तर्राष्ट्रिय नेपाली साहित्य समाज (अनेसास) बेल्जियम च्याप्टरको पुर्नगठन गरिएको थियो । २०१०–१२ कार्यकालको लागि सर्वसम्मतिबाट कृष्ण बजगाईंको अध्यक्षतामा ९ सदस्य कार्यसमिति पुर्नगठन गरिएको छ । जस अनुसार उपाध्यक्ष पदमा विमल गिरी र दीपेन्द्र के सी, महासचिवमा राजकुमार पुडासैनी, सचिवमा दीपक ज्योति पौडैल, कोषाध्यक्ष्मा जे बी शेर्पा, सदस्यहरुमा पंचम अधिकारी, रुक्मणी अमात्य र राधाकृष्ण अधिकारी रहनु भएको छ ।