उस्तै थिए

हरि मानन्धर "विवश"


सुन्दरीका पछि लाग्ने सुरा पनि उस्तै थिए
मोज मस्ती रमाइला कुरा पनि उस्तै थिए

रंगीचंगी प्रकाशमा मदहोस बन्दै गर्दा
संगीतमा छिन्छिन् बज्ने चुरा पनि उस्तै थिए

यौवनको उन्मातमा झल्किएका अंगहरू
आकर्षणमा जिस्काउने भुरा पनि उस्तै थिए

शरीरको आकर्षण बढाउने होड्बाजीमा
नखाएरै ख्याउटिएका लुरा पनि उस्तै थिए

आम्नेसाम्ने आँखा जुधे पल्याक् पुलुक् आँखा तर्दै
निहुँ खोज्दै बोल्ने जिब्रे छुरा पनि उस्तै थिए