ए सर्जनहरू ! मेरी आमा जिउँदो नै हुनुपर्छ अपरेसन पछि पनि , बुझ्यौ त ?Share

- अशोक पार्थिव तामाङ
मेरी आमाको सर्जिकल
अपरेसन गर्न
हत्तारिएका
ए सर्जनहरु !
ए डाक्टरहरू !

हस्पिटलको वार्ड भरी
आधा सेतोमा आधा कालो
मिसिएको एप्रोन लाएर
डाक्टर हुँ भन्नेहरु !
तिमीहरू प्रति
मलाइ शंका लागिरहेछ ।

के तिमीहरू साँच्चै
पढेर डाक्टर भएका हौ ?
नत्र किन तिमीहरूको
पहिरन सुहाएन नि ?
एप्रोन त प्रायः सेतो पो हुनुपर्ने नि, होइन र ?

मेरी आमाको प्वाल परेको मुटु टाल्नुछ ,
गरीवीले खाएका भल्वहरू फेर्नु छ ।
हातमा ग्लोब्स लगाएर
फोरसेप , क्लैम्प ,सिउचर सेट
अनि
सर्जिकल ब्लेड बोकी
मुखमा माक्स हाली
ब्यान्डेज ,कटन ,ड्रेस्सिङ सेट
एन्टिसेप्टिक त बोकेको देखियो ,

आफुलाई सर्जनहरु त भन्छौ ।
तर
तिमीहरु त
संख्यामा पनि
बग्रेल्ती देख्दैछु
जुलुस जस्तै ।
कतै तिमीहरु
इन्टर्नसिपका डक्टरहरु त होइनौ ?
मलाइ त पत्यार लागेन ।

मेरी आमाको अपरेसनको लागी
अहिले
असली डाक्टर पो खोजेको छु ।
जसले मुटु फेर्न सकोस् ।
तिमीहरू जस्तो सर्जन होइन ।

त्यसैले
बिना अध्यन
चिरफार मात्र गरेर
सर्जन हुनखोज्नेहरूले त
बरू
कसाइँ भएकै राम्रो हुन्छ।

त्यसैले
त्यस्ताहरूले हात नलाँकै राम्रो ।
मेरी आमाको देहमा ,
कम्तिमा मान्छे त मर्दैन।

अहिले एनेस्थेसिया दिँदैछौ ,
मेरी आमालाइ बेहोस पार्न
तर तिमीहरूको लापरवाहिले
मेरी आमा
सँधैको लागी बेहोस् नहोउन् ।
त्यसैले
होसियार ! होसियार !! होसियार !!!

आमाको छातीमा सर्जिकल ब्लेड नाँच्दा
म दुःखेर रोएको हुन्छु ,
किन भने यि मेरी आमा हुन् ।
यि मेरी जन्मभूमि हुन् ।
देवता भने नि यिनै हुन् ।
भाग्य भने नि यिनै हुन्।
हो मेरी आमा सिकिस्त छिन् ।

त्यसैले हस्पिटलमा
बचाउँनको लागी ल्याएको छु
तर तिमीहरूको
अभ्यासको भ्यागुता बनाउँन होइन ।
कलकलाउँदो अधबैंसे जीन्दगी
यदि केहि भयो भने
म छाड्नेछैन नि, बुझ्यौ त ?

त्यसैले
इमरजेन्सी देशका
ए सर्जनहरू !
मेरी आमा
जीउँदो नै हुनुपर्छ
अपरेशन पछि पनि ,
हो जीउँदो नै हुनुपर्छ
अपरेशन पछि पनि ।
सुन है सर्जनहरू !
कुरा
बुझ्यौ त ?


तपेश्वरी १ , उदयपुर

हालः ( इजरायल )