के थाहा ? समयले पर्खेको मान्छे तिमी पनि त हुनसक्छौ नि !

- अशोक पार्थिव तामाङ

के थाहा ?
समयले पर्खेको मान्छे ,
तिमी पनि त हुनसक्छौ नि !
त्यसैले ,
प्रयास गरेर त हेर ।


ए युवाहरु !
तन्नेरी मन लिएर आउ ।
तन्नेरी ज्यान मात्र किन देखाउछौ ?
के थाहा ?
समयले मागेको मान्छे
तिमी पनि त हुनसक्छौ नि !
त्यसैले ,
प्रयास गरेर त हेर ।

वर्तमानको क्यालेण्डर
तेन्जिङ र एडमण्ड हुने
साहस बोकेर जुर्मुराउ ।
समयले तिमीलाइ नै त खोजिरहेको हुनसक्छ ।
के थाहा ?
समयले खोजेको मान्छे
तिमी पनि त हुनसक्छौ नि !
त्यसैले ,
प्रयास गरेर त हेर ।

कति सुस्ताउँछौ , कति चिच्याउँछौ ?
समयले ठग्यो भनेर ।

अँधेरो छ समय चारैतिर ।
त्यसैले मैनबत्ति सल्काउँने
कोशिस् त गर ।
हावा हुरी चल्नु अघि नै
त्यहि मैनबत्तिको उजेलोमा भएनि
हिंडाँइको चार भञ्ज्याँङ काटेर ,
सपनाको आँगन टेक्न पनि त सक्नेछौ ।
के थाहा ?
समयले रोजेको मान्छे
तिमी पनि त हुनसक्छौ नि !
त्यसैले ,
प्रयास गरेर त हेर ।

मनलाइ कहिले काँहि गोडेर त हेर ।
कर्मशील हातले श्रृजनाको पाइला चालेर त हेर ।
कसो नफुल्ला फुलहरू ?
बाग भरी रंगीबिरंगी
माली बनेर
मनलाइ जतन गरेर त हेर।
के थाहा ?
समयले पर्खेको मान्छे ,
तिमी पनि त हुनसक्छौ नि !
त्यसैले ,
प्रयास गरेर त हेर ।

तर
तिमी किन थाकेको नि यसरी ?
तिम्रो निधारमा
चाउरिएका रेखाहरुको फुल
केको लागि ?
केमा टाँस्ने हो त्यो लोगो ?

जवान समय बोकेर आफुसित
बृद्द सोचाइहरुको
किन फुल कोरेल्छौ ?
समय सिद्धिएको छैन ।
समय मरेको छैन ।
समय मर्दै मर्दैन ।
तिम्रो परिश्रम
जारी रहे

के थाहा ?
एकदिन
समयले पर्खेको मान्छे ,
तिमी पनि त हुनसक्छौ नि !
त्यसैले ,
प्रयास गरेर त हेर ।

तपेश्वरी १ , उदयपुर

हालः ( इजरायल )